三十年前講跳舞，可能會被父母鬧無前途。三十年後的今天，舞團數目大增、大眾接受及欣賞程度大大提高。香港藝術發展局更在今年首辦「香港舞蹈節2010」，打頭陣竟是你同我都在YouTube睇唔少的街頭快閃舞，潮到升呢！
記者：林佩婷
攝影：陳陶鈞、王文忠
頭炮作：街頭快閃舞
快閃文化源於外國，且於香港逐漸為人所認知，今屆大會特地聯同香港青年協會舉辦「快閃舞計劃」作頭炮，招募了100名年輕舞者作「起舞大使」，於不同日子在港九、新界街頭起舞，分三隊五分鐘內表演現代舞、Jazz和HipHop，並請專業排舞老師教授。排舞師Rock就負責教他們HipHop，他的舞蹈經驗超過十年，這次要教幾十人街頭快閃跳，就要作出特別安排，「歌曲方面我揀咗《Solo》，內容有關在人生路上有個伴互相支持，主題最後係鼓勵年輕人多啲溝通走入人群，意識好健康。由於係快閃舞，我那段HipHop編排屬Part3，所以佢哋要先扮途人，音樂響起先來一男一女以朋友身份相遇，即時在中心點倒立吸引途人，跟住齊齊舉手跳舞。由於在街頭起舞，所以動作唔會好局限，每個地方的環境都唔同，要隨機應變。好似皇后像廣場地方較窄，又要避開水池，擺位就有唔同。又例如銅鑼灣人流多，行人區又有手推車、BB車，所以好大挑戰性。」快閃舞的精髓，是要在街頭表演順利之餘，又能和觀眾互動，Rock亦有畀貼士他們。「我會同學員講唔使表演得太Format，唔好以為途人一定做觀眾，避免用談話同佢哋溝通，最好用身體，只要引到佢哋笑或一齊郁就已經成功。」
排舞師：教兩次熟晒
Rock十多年前見人哋在街頭玩舞好有型，於是學埋一份，他說由最初的偏見到現在的普及，大眾接受度不斷改善。「HipHop舞蹈好有個性，我都有喺街頭跳過，十多年前喺街頭玩可能會俾警察趕，近年多咗有關跳舞的電影，又有傳媒報道、學校又搞比賽，開始多人欣賞。」對於今次年輕人的表現，他覺得不錯，「雖然幾十人至百人喺條街跳舞要安排好多嘢，但以前都試過一次過安排200人跳舞，所以問題不大。呢批年輕人有活力，教兩次已熟晒。」
舞者：好興奮好深刻
負責HipHop部份的Maggie，是從社區中心見到活動宣傳海報而報名，她由上年開始學HipHop，經面試後成功入圍。「我同朋友一齊參加，面試時導師畀音樂叫我哋跳，跟住取錄咗。呢次表演綵排只有幾堂，啲人又唔熟又係陌生地方，初時都好驚，後嚟融洽咗無咩問題。對自己嚟講，最難係記Step，因為本身記性唔算太好。」以前在台上表演，今勻首次在街頭跳，難免緊張，「上台有指定觀眾，但街頭可能只係行人經過，唔會認真睇你跳，不過就有種好Close的感覺，因為大家眼神接觸時有對我哋笑，睇得又開心。首次表演好興奮，咁多人一齊好深刻。」
舞者：快閃舞是藝術
Suger係負責Jazz部份，相比HipHop，Jazz給人感覺更柔和，在熱鬧街道表演看似格格不入，不過Suger說沒問題，「成個JazzGroup學咗16個鐘，兩次Fullrehearsal，市民反應好好，企定定喺旁邊睇。對我嚟講最大挑戰係每個地方都唔同大細，要好清楚自己位置，好似山頂個地有少少斜，加上大專搞OCamp勁多人，中途又有少少雨，感覺勁特別。」對於快閃舞設計，她說已成一趨勢，「好似YouTube有外國基督教團體為對抗Halloween都用快閃舞表達，其實世界各地都好流行，喺香港亦漸受人注意。家市民欣賞能力提高，表演唔單止係睇，仲會用藝術角度研究。」
11月6日快閃舞時間表：
13:00尖沙嘴碼頭、15:00旺角朗豪坊4樓、16:30荃新天地
東坡以詩入舞
別以為今個舞蹈節的亮點只有快閃舞，其實每個有關合作舞團都有新創作。香港舞蹈團就創作了大型舞劇《瀟灑東坡》，藝術總監梁國城從眾多詩人中揀選了蘇東坡作表演題材：「蘇東坡生平好豐富，一方面為多才多藝的詩人，另一面卻是不得志的政治家，三度被貶流放，依然保持豁達心態。幾十年波折表現到詩人情懷，我諗到用舞來全面表達人性同感情。」整段舞劇分六場十三段，摒棄一般平鋪直敍手法，而用跳躍式表達、令思維想象空間更大。他將蘇東坡的生平分為三個部份，集中表現佢的唔同情感，「首先係兄弟之情，蘇軾蘇轍兩兄弟互相扶持，《但願人長久》都係為細佬寫；跟住係同妻子之情，我將史實中的三位夫人合而為一，表達『十年生死兩茫茫』的刻骨銘心感情；第三就係事業上的坎坷，佢同王安石政治上的紛爭，到最後兩人會面。」表現手法上，梁生選用太極溶入舞蹈，「用舞蹈帶出詩詞意境，尤其是蘇東坡飲醉後才會詩興大發。而太極柔和中有韻律動作，好似《千里共嬋娟》部份，用太極韻律、沉實下肢動作加上身推搖手法表現人的感情風格。」
《瀟灑東坡》
日期：12月3-5日
地點：香港文化中心大劇院
三年一遇舞蹈節
身為藝發局舞蹈組主席的何浩川，覺得30年來港人對跳舞看法有很大的轉變。「以往香港市民一講跳舞可能係老人家喺社區會堂跳，但近年越來越蓬勃，不少專業舞團都有國際水平。為咗令更多人一齊參與，加上配合西九文化區發展，培養未來觀眾，所以決定舉行首屆舞蹈節。」是次活動籌備年半，主題集中香港的原創性，故不主張太多外來節目，除了合作的十個跳舞團體有自己創作表演外，還有不同專題研討會，務求做到「跳出創意．舞在生活」。「其實創作來自生活，舞蹈家編排的節目會成為普通市民生活一部份，所以就以『舞在生活』做主題。打頭陣的快閃舞，取材自歐美類似活動，頭兩次反應好好，尤其在山頂，觀眾事先不知情就更有驚喜。」基於資源問題，舞蹈節暫定三年辦一次，目標做到全民參與。
第一屆香港探戈節
除了香港舞蹈節，11月9日至14日亦有團體舉辦「第一屆香港探戈節」。由本地阿根廷探戈愛好者成立的探戈堂主辦，希望推廣阿根廷探戈舞蹈及音樂文化，除有舞蹈示範、還有文化日、舞台劇和影展，同時更邀請了三對世界級專業探戈舞者來港作公開表演。
查詢： http://www.hktangofest.com
香港舞蹈節2010
日期：11月11日至12月18日
查詢： http://www.hkdancefestival.org.hk
