社民連黃毓民上周四入院做黃斑點病變手術，由於手術後需時休養，本來留醫四日，延長至最快今個禮拜尾先決定到幾時出院，不過佢今日會向醫院請假，唔係保外就醫，而係投票。
立法會今日辯論促請中共釋放劉曉波動議，因此黃毓民未完全康復都要到立法會發言同投票，據陳偉業講，毓民今日會將部份講詞內容以普通話讀出，因為想多啲內地同胞聽得明，不過佢話毓民表明，今日發言只能「悲情而唔激情」，因為怕太激動會影響眼神經，真正眼火爆就手尾長。陳偉業又笑言，日後毓民網台節目宣傳聲帶都要改一改，由以前標榜「青筋暴現」改為「溫和淡定」。