長安居不易，日圓紙水高，對香港人嚟講都居不易，要在日本逗留一個月，八方一直以為冇幾萬蚊盤川一定冇可能，但係竟然有個香港人夠膽死攞住2,000蚊就起程去日本。呢個人叫郭偉欣，今年27歲，中三後就冇讀書，又冇做嘢，日日匿喺屋企打機，可以話係典型隱蔽青年。
偉欣上個月初攞住2,000蚊就離開香港，屋企人都唔知佢去咗邊。原來佢先到廣州，再搭火車去上海，然後坐飛機去到日本茨城，剩番約1,000蚊喺東京四圍蕩。但係日本百物騰貴，佢好快就盤川用盡，要靠餐館施捨白飯，夜晚就瞓火車站，直到近日身體頂唔順先至向日本警方求助。
呢位2010年「電波少年」咁傳奇，真係唔知應該鬧佢好定係佩服佢好！入境處同香港駐東京經貿辦都話，已經知道郭偉欣嘅情況，會聯絡佢屋企人，提供一切可行協助。