有「大帝」之稱嘅NBA球星勒邦占士，原來唔單止鍾意籃球，對英式足球亦有一定興趣，其中今季由巴塞隆拿轉會美職球隊紐約紅牛嘅法國前鋒亨利，仲係大帝喺足球壇上嘅偶像㖭！咁啱效力邁亞密熱火嘅勒邦占士，喺星期日隨隊到新澤西比賽，於是就去咗紅牛探班，佢同亨利有講有笑，兩人仲識英雄、重英雄咁握手同合照；而勒邦占士更不忘祝亨利嘅紅牛可以喺周四嘅美職聯季後賽東岸4強次回合，順利解決聖荷西地震。
勒邦占士說：「假如我哋嘅時間表許可嘅話，我希望今季可以去多睇佢幾場球賽。我相信如果可以喺紐約同佢一邊吃晚飯，一邊傾吓體育，一定會好正呢。」
我求大俠身邊嘅潮人朋友就話，從勒邦占士同亨利嘅合照之中，仲睇到呢個秋冬最潮嘅男士打扮，因為佢哋兩人咁啱潮着開胸扣鈕冷衫，喺入面都係着恤衫打呔，下身襯牛仔褲㖭！睇嚟我求大俠都要拿拿臨摷返陳年讀中學時，返學着嘅開胸冷衫，喺呢個秋冬做潮人先得。