由貿發局主辦嘅第5屆國際環保博覽，噚日響亞洲博覽館揭幕，今年有超過260個參展商，個展覽星期六先開放畀公眾免費入場，大家到時可試坐Volkswagen嘅新混能四驅車！華華噚日先睹為快，好多展品包你睇完會諗起「國產零零柒」裏面周星馳嗰隻風筒鞋……
梁鑑章攝
1.免洗粉「蛋」衣機
呢隻雞蛋並唔係一隻雞蛋，而係一部洗衣機！而作為一部洗衣機，佢最特別之處係竟然唔使用洗衣粉就可以洗衫，簡直係環保嘅最高境界！佢嘅原理係透過電離空氣產生臭氣負離子將啲衫消毒，換言之其實佢主要嘅功能係消毒，聽聞仲可以漂白㖭！
2.差乜都得背囊
呢個背囊亦唔係背囊，係一個乜都叉得嘅叉電器！每日出街陀幾部電子儀器，手機、MP3同相機都好幾部，唔記得叉電嘅情況時時發生，就算有帶叉機，但無電源都唔掂。除咗背囊頂部太陽能板發電之外，前面細袋仲有電池同8個插頭，有咗佢，真係差乜都得……
3.寧舍香油漆
呢桶油漆就真係一桶油漆嘞！新裝修嗰陣油漆味，好多時好似陰魂不散咁，唔係個個頂得順。有菲律賓人就發明咗呢隻空氣淨化油漆，用咗佢，唔只無晒油漆味，仲可以淨化空氣，原理係以油漆中既二氧化鈦同光作用，真係聞一聞好精神、索一索舒筋活絡o架！