立法會負責調查雷曼事件嘅專責小組08年底成立時係威係勢，有成廿幾個議員加入，事隔兩年越來越有爛尾味道，小組成員買少見少，繼早前退出嘅民主黨主席何俊仁、副主席劉慧卿、公民黨吳靄儀、陳淑莊以及自由黨方剛後，會計界陳茂波亦求退，小組成員減至唔夠20個人。
陳茂波話雷曼小組最初成立嘅目的係幫苦主爭取賠償，佢加入小組都希望可以向政府施壓；兩年過去，好多苦主已經攞到合理賠償，佢話與其再花時間喺呢個未必有大家所期望嘅調查結果，倒不如將啲時間用喺其他實務事件上，佢冇話要花時間落區預備直選，只係話要搞競爭法同公司法，加上小組有好兄弟陳健波坐鎮，已經可以代表佢咁話。