【本報訊】大學生聯手力抗大家樂集團，中小學師生要參與卻有難度，事關到校午膳服務大多是一個月前預訂，罷食恐怕會浪費食物，「上個月已經畀晒下個月所有飯錢，唔食留校又冇其他選擇，最後又浪費咗變廚餘」。
「上個月已畀晒飯錢」
大家樂集團旗下活力午餐以提供全日制中學及小學到校午膳服務為主，擁有約25%市場佔有率。津小議會主席張勇邦指，就算學校對個別承辦商有意見，亦難以貿然參與罷食行動，「始終係之前訂定合約，我哋一定要依從。日後會唔會再同某承辦商續約，要由校內遴選委員會決定，或者佢哋日後都會考慮員工福利問題，但係一般我哋都係關心食物安全同服務質素」。
中學生聯盟行政秘書池卓龍承認，學生要在校內抗爭有難度，「雖然網上好多人支持，但係喺中學罷食好難，因為集團係以一個月為單位做綁死銷售，你上個月已經畀晒下個月所有飯錢，唔食留校又冇其他選擇，最後又浪費咗變廚餘」。