荷蘭翼衞德倫特跑得快就係人都知，估唔到揸車都一樣咁快，日前喺西班牙亞坎利堤因超速被捕。本來球星開快車唔係乜嘢大新聞，但弊在佢開到成時速180公里，兼且仲連衝6盞紅燈，當正條馬路係賽車場，好彩冇搞出事，如果唔係就後悔莫及。
話說今季俾皇馬借去升班馬靴高斯嘅德倫特，喺上周五清晨4點4，因超速而被西班牙警方拘捕。據了解，當時佢揸住部AudiQ7旅行車，開到時速180公里。咁都未算誇張，佢仲連衝6盞紅燈，當啲交通燈透明。而佢喺被捕之後，同差人解釋自己開快車兼衝燈，全因為趕住救命，要送車上中咗酒精毒嘅朋友去醫院。
事後講大話兼襲警
不過，醫生幫德倫特位朋友檢查之後，發現佢根本冇中酒精毒，只係飲醉酒，換言之德倫特係講大話。聽講佢喺醫院度仲郁手打兩個差佬。家陣佢超速同衝燈經已好大鑊，如果俾警方告埋襲警，佢肯定有排煩。今次唔係佢首次開快車而搞出事，早喺07年，佢喺馬德里一條高速公路同一架警車碰撞，佢自己就冇事，不過就搞到一個差佬受咗輕傷。聽講靴高斯對呢單嘢非常重視，除咗會紀律處分之外，仲要佢出嚟同公眾道歉。
我求大俠喺度諗，德倫特今次又超速又衝燈，會唔會同佢喺西甲發展唔如意有關。佢喺荷甲同埋U21歐國盃響朵後，07年夏天以1,400萬歐元（約1.4億港元）由飛燕諾轉投皇馬。但佢喺皇馬3季坐多過踢，今季被借到靴高斯後，發展亦麻麻。眼見飛燕諾幾位師兄尹佩斯、沙洛文卡勞喺英超都發展得好好，德倫特可能諗埋一邊，揀揸快車嚟發洩。
不過點都好，學特區政府話齋，超速駕駛、影響人生。德倫特得23歲，前途一片光明，如果因為開快車而搞出事，人生就咁玩完。希望佢經一事長一智，第日唔好再開快車，專心搞番起自己嘅足球事業啦！
資料庫：快馬系出名門
飛燕諾係荷甲傳統3強球會（其餘兩隊係燕豪芬及阿積士），出過唔少頂尖球員，好似出身於FC哈林但成名於飛燕諾嘅荷蘭名宿古列治，近年亦出產過前鋒尹佩斯、沙洛文卡勞及施摩拿歷克。不過，該隊喺07年夏天輸出嘅翼衞德倫特，卻雷聲大雨點小，令到歐洲頂級球隊唔敢再打飛燕諾嘅年輕球員主意。飛燕諾近年嘅荷甲成績越踢越沉，今季仲成為下游分子。正因為咁，今夏轉會到馬略卡嘅中場約拿芬迪根斯文，可能成為飛燕諾青訓省靚招牌之作。