兩年後嘅特首選舉已屆入閘階段，其中一個喺沙圈熱身多時嘅準候選人，八方相信佢想即刻出閘，之不過亦有人可能要退下戰線。心臟病突發通波仔嘅財爺鬍鬚曾，據講已在不少人面前流露退意，幾個月前喺一個飯局上，更問人2012年新政府組成後，佢何去何從？
其實鬍鬚曾有此提問一啲都唔令人意外，事關八方知道唔少圍內人，即係建制派、親中人士已經落晒飛，買重注政務司司長唐公子九成九係下屆特首；至於狀態甚勇嘅梁振英，有人形容佢只係「白做」工夫，黑馬都談不上，僅有一線生機係一旦唐公子有乜差池，俾阿爺臨危受命補上啫。
更上一層樓嘅機會都微
肯定與特首寶座無緣嘅鬍鬚曾，連更上一層樓嘅機會都好微，事關眾所周知，下屆政務司司長一職，出「行」力同地產商拗手瓜嘅發展局局長林鄭月娥已經「坐硬」，意味鬍鬚曾兩年後一係同好兄弟煲呔共進退，一係就原地踏步繼續做財爺，唔通降呢做番局長咩！既失特首之位，又失升呢機會，鬍鬚曾可謂「雙失」。
有傳鄭大班已成唐公子競選班底，八方聽聞運籌帷幄造王者其實另有其人，就係喺中央圈子內交遊廣闊、處事蠱蠱惑惑嘅前政務司司長許仕仁（肥龍）。肥龍閒來醉心聽歌劇跑馬仔，另一拿手好戲係幫人搭台，肥龍同唐唐關係甚深，有佢幫手，唐公子等住黃袍加身啦。
唐公子少去馬場改形象
唐公子表面上好似未有積極為跑馬仔備戰，心水清人士卻留意到，唐公子似乎已暗中做嘢，其中一個例子，係向來鍾意喺馬場露面嘅唐公子，近期似乎罕有現身馬場，有人認為佢可能要重塑形象，唔好俾人覺得佢成日同權貴交往，去馬場廂房呢啲地方，寧俾人知，莫俾人見咁話。
唐公子9月突然上京，神神秘秘密會京官，原來係討論23條暫不立法問題，民主黨卿姐今日質問佢點解唔交代見京官內情，又要求政府提供官員與京官會面嘅資料，唔知唐公子如何接招。
mailto:[email protected]