噚日個市認真悶，現貨成交全日只得762億，恒指波幅狹窄，埋單報收23671，升18點，投資者觀望情緒濃厚，連短炒嘅活動都少咗。
花旗國會中期選舉同埋QE2係市場嘅焦點，兩樣嘢都好快有結果，即係話市況好快會明朗，由於QE2係全球嘅焦點課題，所以港股嘅即時反應都會跟大隊。今日九龍城又有地皮拍賣，賣地成績喺「發水樓新限制」嘅背景下會特別受關注。
濰柴C輪25168：濰柴動力（2338）報收106.30元，升6%。股價由9月初開展新一輪升浪，轉眼間已經升破百元關，創新高兼做埋「紅底股」，業績好前景佳係濰柴股價越升越有嘅原因，可以諗吓隻C輪25168，揸耐啲博正股升上140元。
隻輪現價38.5仙，2011年10月26日到期，行使價90元，溢價20.9%，引伸波幅78.6%，槓桿率2.8倍（有效2倍），正股升上140元，25168睇65仙，升幅近7成，正股跌穿94元就沽咗隻輪。
俊樺