無綫一眾當家花旦對汽車嘅要求都幾高，一般都鍾情歐洲車，唔計最早加入德國車一族嘅阿佘佘詩曼，廖碧兒都揸緊架意大利車仔，出道較早嘅楊怡當然唔可以執輸，最近佢就買咗架平治襯番自己。
早年楊怡揸嗰架福士車仔，最後證實係佢家姐男友燈箱大王借畀佢用，其間引發過美麗的誤會。今時今日佢卒之有架屬於自己嘅歐洲車，而且仲係大廠平治嘅產物。雖然登記車主係楊姓男子，不過所用嘅車牌號碼就係楊怡一向用開，而且就泊咗喺佢住所樓下嘅停車場，相信呢位男士同阿怡都有親戚關係。
呢款E-classE200CGI出車價成66萬，標榜嘅除咗舒適同豪華之外，尾後嘅CGI就係慳油嘅代名詞，亦係呢部車賣點之一。雖然只係得1,796cc汽缸容量，但因為加咗Turbo（渦輪增壓），就令到馬力達到184匹。
換跑車胎
雖然架車落地唔夠兩星期，為咗令部車嘅性能更進一步，楊怡已經豪花近4萬蚊，為愛駒換咗套高性能跑車胎，相信日後佢唔使再衝紅燈都可以令狗仔隊食塵。
