無論你係幾多十後，睇得財經版，個個都想偷吓師，睇吓啲高手有咩曠世奇招幫自己累積財富，華華噚日去咗兩場talk聽咗大堆專家講股講樓，金句連連。為咗大棚福利，華華揀咗4個心水之選，畀大家參考參考。贏過嘅，希望大家繼續贏；之前輸過嘅，唔使驚，聽吓專家之言，話唔定好快你就可以大聲咁講：「唔係要證明我威，只係想話畀人聽，我唔見咗嘅嘢，可以自己親手攞番！」
美國聯儲局就快出撒手鐧QE2（第二輪量化寬鬆政策），令到全球股市熱炒。作為新興市場之首嘅中國，意識到熱錢不斷流入嘅危機，急急加息兼收緊銀根。中大全球政經碩士課程兼任講師黃元山同好多專家都有一致口脗，話香港短期內受熱錢流入影響，資產價格會繼續升，佢仲擔心喺兩個超級大國（G2）搏弈下，因為港元與美元掛鈎而無法擁有自己的貨幣政策，香港將會成為G2貨幣戰爭下的「炮灰」！
香港股樓價 有力向上
黃元山認為，美國經濟依然係弱過藥煲，儲局嘅量化寬鬆政策只係政治手段，所以規模同時間表都係冇嘅。美國諗住用QE2質低美元，搞到其他國家通脹，再令美國通脹升溫。但佢哋嘅如意算盤未打得響，「俗語話『你有張良計，我有過牆梯』，美國加大力度泵水救經濟，中國收水嘅力度都會相應增強，唔會俾人谷爆個市。面對中國收緊銀根，香港市場可唔可以繼續一枝獨秀將會係一個疑問。」
不過黃元山又冇睇香港後市睇到好淡：「家市場有好高嘅預期，所以香港股樓價格上升嘅動力仍然充足。不過，一旦美國大開水喉，中國以加息應對，咁香港又有好多資金同中國大陸有關，如果認為香港可以置身市外股樓齊鳴，就未免過份樂觀囉。」
另外，由於市場波動，同埋不確定嘅因素實在太多，佢建議散戶投資者應量力而為：「有好多人都話家係發達時機，但若去到要沽出自住的單位入市孤注一擲，我唔建議。」
李華華
mailto:[email protected]