財經專欄作家曹仁超曹Sir睇好A股：「中國人民銀行今年6月尾宣佈人民幣進行第二次滙改，我估人民幣升值將會帶動A股市場，響2012年7月之前仍然會反覆上揚。」而佢中長線睇好嘅板塊就包括金融、房地產、消費同埋高新科技。「響15年內，中國消費市場將會爆炸性上升，為投資者提供好多賺大錢機會。」
曹Sir話，「相信A股唔會好似05至08年期間咁大上大落，響未來兩至三年將會理性上升同調整，整體而言A股將會反覆向上。」
想發達 唔買人債
咁曹Sir點睇人債？「買債券都OK……買債係畀啲唔想發達嘅人去買，我想發達，我就響度搵緊邊間係第二隻騰訊（700），最好喺4蚊買到佢，之後上到185蚊，發達咯！我係StockPicker，所以債券嚟講，我唔係睇淡，而係唔啱我哋呢啲成日希望（揀）爆炸性上升嘅股份，我唔滿意於5至7%嘅回報……」
「你今年7月買隻哈動（1133），家佢賣返出去，都夠畀首期啦！」曹Sir寄語年輕人唔好因為金融海嘯而卻步，佢話：「金融海嘯大定73至74年嘅危機大？你叻定我叻，28萬身家輸剩7千蚊，你狼定我狼？後生仔有一句『輸完又嚟賭過』，你有幾多身家？又唔係一、二百億，輸咗幾十萬之後，拍下籮柚咪又再嚟過囉，後生嘅優點係打不死、跌不死嘛，我家年紀骨頭輕，一跌就死！而年輕人更加應該北上尋找機會，唔好等財富自己跌埋嚟。全國咁大，唔好成日踎響度做你嘅蝸居囉！」
李華華