有錢，講句嘢都唔同啲。因「疏忽」漏報多個物業，「咁啱」個仔又摩售單位賺大錢嘅行政會議成員劉皇發，噚日出席完「閱讀在屯門」發佈會，被問到超級區議員選舉經費上限高達600萬，政府只肯畀一半，參選人破產都唔掂，發叔眉頭戚兩戚咁話：「選舉有代價嘛！」
區區300萬，對發叔梗係濕濕碎。講到超級區議員提名門檻要15人，發叔更加大口氣，話成個區議會有400幾人，「難咩？唔難呀」。不過，佢話自己就快100歲，下屆唔玩咯。噚日佢就揀咗本《牛仔》漫畫送畀孫仔，仲自爆「我未睇過，好似係講溫情」。
都啱嘅，親情向來重要，唔係個仔炒樓，累到老竇就唔好啦。