為咗保護豆腐而被判襲警嘅社會運動員楊匡今日出獄，一班戰友噚日再去探佢。原來楊匡本身有濕疹，天氣轉變監獄入面又冇藥膏，面同手都紅晒又痕，比較攰同埋憔悴，今日出嚟會先返屋企休息，周末可能開記者會。
戰友聲援
同楊匡並肩作戰嘅阿橙話，司法制度淪為打壓示威者嘅工具，以前梁愛詩都唔會害咁多後生仔，家黃仁龍為咗擺平件事，比梁愛詩更狠。之前因為狙擊商台節目《十八仝人愛落區》嘅梁穎禮同埋胡永勤被控喺公眾地方擾亂秩序，今日起連續三日喺粉嶺上庭，FM101嘅朋友仔星期三會去聲援。阿橙話，佢哋遲啲會整理統計數字，睇吓自利東街事件後，社運人士被拉同埋坐監情況，再向國際組織報告。