超過160年歷史嘅上環荷李活道文武廟噚日舉行一年一度秋祭大典，香火特別鼎盛。典禮由東華三院主席梁定宇主祭，佢話中國以農立國，每逢秋季百穀豐收，都會按習俗舉行祭祀感謝神恩，順道替港人祈福消災。而廟中平時上鎖、寓意擋煞嘅中門，仲會喺秋祭期間開放畀市民參觀。
文武廟係本港最歷史悠久嘅古廟，建於清朝道光年間，1908年交畀東華三院管理。梁定宇話以前文武廟喺華人社會好巴閉，總之有行業或鄉村有問題，就會交由廟中理事解決，功能好似家嘅終審法院。佢仲透露，本月中政府會刊憲，將文武廟連同隔籬嘅列聖宮同埋公所，一同列為法定古蹟。