行善可以積德，積德可以上天堂。首富李嘉誠早排撥出三億做善事，成立咗一個「LoveIdeas,LoveHK集思公益計劃」，過千機構同個人響應，報名申請基金。公眾可以投票選出邊個計劃值得資助，截至噚晚7點鐘為止，公投結果排頭位嘅，係黃大仙區關注流浪狗組織嘅計劃。
李首富辛辛苦苦起咁多樓之餘，仲可以扶助到咁多流浪狗，真係令人欽敬。集思公益計劃申請者仲有好多創意，其中有個建議，係想搵李超人幫手，構建和諧社會。呢個計劃叫「我住狗竇」，計劃簡介話，希望出版一本書，令香港各界更了解夾心階層嘅住屋需要。
「我住狗竇」計劃書提到，俄羅斯國際房地產諮詢公司GordonRock近期比較咗全球35個城市居民嘅供樓能力，德國柏林人只需三年就可甩身，而香港人就排尾四，平均要20年先供完小小嘅「狗竇」。構思中嘅書本，係想透過文字同照片，探討香港夾心階層嘅住屋經驗，等普羅大眾能夠認識到呢群無殼蝸牛嘅苦與樂。
歡迎公眾上載照片
計劃倡議人已經喺facebook成立咗一個群組，網址係 http://www.facebook.com/# !/album.php?aid=249461&id=614326816。公眾可以上載自己住緊嘅狗竇相片，再以文字分享一下蝸居嘅心聲。負責人會將呢啲有血有淚嘅個案，喺公眾場所巡迴展覽，鼓勵各區人士認識夾心階層嘅居住現況同問題。整個計劃預算只係二萬五，大約只係天宇海一個單位一個月租金嘅價值。既然呢個公益計劃話明要凝聚全港市民愛心，創造一個處處有關懷，人人樂助嘅社會，八方深信「我住狗竇」呢個關乎到無數蟻民生活嘅計劃，必定獲得首富嘅認同。
當然喇，造福人群呢樣嘢，並唔係首富嘅專利。噚日八方睇報紙，發現除咗李嘉誠基金會為公益計劃賣咗則廣告之外，幾個大發展商，包括新鴻基、信和同新創建都有賣廣告，用唔同嘅文字圖片來彰顯大財團對社會環境嘅關懷。大家咪再仇富喇，富商平時唔賺得盡啲，邊有錢捐嚟資助呢樣嗰樣？邊有錢賣廣告表揚大愛呀？
mailto:[email protected]