民企之父張化橋話，佢喺3年前領略到一個新策略：「香港有約1500隻股票，先拿掉最大和最細的20%，因為大的已經畢業，小的又怕長不大，然後再拿走自己認為有問題或者不懂的行業，名聲不好和見報率高的亦不能碰，最後留低大約300隻，你就可以閉上眼隨便選10隻，就可以跑贏大市！」
跟住佢又話家喺自己手持嘅股票入面，有唔夠50隻係用呢個策略揀返嚟嘅，但至於賺咗幾多呢，佢就死都唔肯透露喎！
唔做分析員 輕鬆好多
張化橋又話，佢自己唔會做短期預測，只會做長期、方向性同模糊預測，因為短期預測成日都會錯，而且好嘅股票一定會升，但市場係唔理性，股價永遠喺升之前先跌20%，結果投資者未等到太陽出嚟就沽咗，結果一沽咗隻股票就係咁升，「我很久之前買了慶鈴汽車（1122）和上石化（338），結果未等到它們升就已經賣掉，輸了好多」。
佢仲話自己以前做分析員嘅時候好忙，「一上飛機就拿五、六份報紙來看，怕自己會看漏政府的政策和銷售數字，一落飛機就立即開電話，通常都有50至80個email等我，回家就第一時間開電腦……」家唔做分析員之後，輕鬆好多：「甚至覺得兩天沒開手機都不成問題！」
家陣出埋書，佢好坦白話有3大目的：「第一是為了出名，第二為內地學校籌款，第三是希望分享多年來的投資心得。」
李華華