涂謹申嫌分析不足
所謂崩口人忌崩口碗，估唔到一大清早，民主黨議員涂謹申（左圖），對一年三造出席財經事務委員會會議嘅金管局總裁陳德霖，就「窩」得咁盡，曾經動議延長任總退休年期嘅阿涂，似乎對金融沙皇戀戀不捨，佢對陳總發言似乎唔多覺「夠喉」，直言以前任總言論，會「畀多啲判斷同估計」，又會陳列A、B、C、D等唔同選擇，分析優劣，佢希望作出更多深入分析，咁先可以對社會發揮穩定作用云云。
何鍾泰錯叫做任總
擔任立法會雷曼迷債小組主席嘅何鍾泰（圖），唔知係咪聆訊期間傳召得任總太多，被任總稱呼「洗腦」，呢位工程界代表，噚日欲向陳德霖詢問歐美經濟狀況及巴塞爾新資本協定時，唔覺意叫錯陳總做任總。不過，見慣風浪、AO出身嘅陳德霖，自然面不改容，以面對涂謹申「比較論」的一貫態度，當無聽過咁繼續按本子回應。
劉慧卿收火「搞gag」
昔日喺立法會答問上，與任總屢次擦出火花嘅民主黨副主席劉慧卿（圖），昨日對陳德霖不單止相當平和，仲識得「搞gag」。美國國會今日中期選舉，量化寬鬆即將出籠，卿姐話，睇民主黨個勢好似唔係好掂，話音未落，依人即刻幽自己個黨一默，話「梗係講緊美國個民主黨」，佢哋個白鴿黨「得唔得就遲啲先講」。
