立法會大會聽日辯論由社民連前主席黃毓民提出、要求釋放剛獲諾貝爾和平獎嘅《零八憲章》起草人劉曉波以及其他在囚異見人士，佢嘅兩位黨友大嚿同長毛都提出修訂聲援戰友，前者呼籲中央政府千祈咪耍手段滋擾劉曉波嘅家人，身兼支聯會常委嘅長毛更加提出結束一黨專政、舉行全國普選以及還政於民，三人輪流出招，議事廳睇怕好熱鬧。
今晚燭光集會聲援
好可惜，特區政府一如過去面對毋忘六四事件、平反八九民運嘅議案時一樣，拒絕派出官員答辯。唔少泛民中人都話係意料之內，事關連特區最高領導人煲呔都話對劉曉波事件不予置評，試問佢啲o靚又點敢貿貿然回應？其實唔單止特區政府，泛民中人相信以民建聯為首嘅建制派當日都會變鵪鶉，唔會開腔發言，可能只得泛民主派唱獨腳戲。
公民黨趁辯論前夕，今晚7點15分喺立法會外舉行燭光集會聲援劉曉波；除咗公民黨領導核心，民主黨、社民連同支聯會成員以及記者協會主席麥燕庭都會出席，公民黨呼籲市民積極參與，藉着點點燭光向在囚異見人士送上支持。