「泡沫點樣先會爆？」呢個係犬兒兩周前冲凉玩水時問嘅問題，佢平時冲凉會用塑膠鎚仔揼爆連同老泥浮在水面嘅番皂泡，觀察到有泡一揼就爆，又到有泡唔揼都爆，就覺奇怪！犬兒綽號「每事問」，一個看似容易實質屬大學論文程度嘅問題，佢阿媽一時唔識答，但佢讀Science嘅老竇就斬釘截鐵一句搞掂：「泡沫夠大就爆o架啦！」
其實呢個答案需唔需要讀Science先識答又真係唔使多講。地產大好友覺得樓市無泡沫，仲話家嘅樓價冇理由低過97。當然，家多咗民企個人游資，又真係冇理由平過97，因為呢班人食正中國經濟起飛條水，每有企業掛牌，民間就會湧現一批新富豪。唔怪得屯門樓呎價都可以過萬，較二手價高一個開啦！尤其當金管局總裁都承認在聯滙下可以做嘅嘢唔多，睇緊啲銀行樓按借貸唔代表一勞永逸，就算樓按信貸資料庫出籠，對於用BVI離岸公司買樓嘅分子更加難管。尤其當中好多係由一小撮人搞出嚟嘅小財團，朋友間流傳嘅故事有啲聽落都幾恐怖。有位阿太俾代理吓又買一間，吓又買多件，幾個月加埋入咗7千呎貨，家見個樓市上緊，但係佢要放貨都要與發展商爭客，借銀行仲係用公司做生意條Line借Prime，仲有好多成十幾年無炒樓嘅都如千年殭屍出籠咁走出嚟爭上車，大家惟有等個泡吹到爆，人踩人，齊齊燒炮仗變炮灰啦。
實力唔夠 上車更危
連地產代理都話近期入市嘅多咗批實力其實唔係咁堅，只要利息一上就隨時死亡嘅一族，佢哋就係驚一旦樓價再上就再買唔到樓，呢種心態跟自己在97時好似，結果係惟有講句好彩自己有holdingpower。結婚真係唔一定要有樓，供一層荷包不能承受的樓，隨時慘過內傷。最緊要係無人敢出嚟揼爆個泡，咁就惟有由得佢夠大嘅時候就爆啦！
有能力keepinvesting嘅樓市、股壇老兵，根本唔會成為見頂指標，只係當發現周圍入市者都係欠缺實力嘅殭屍時，因為連殭屍自己都未必知道自己已變活死人。
胡孟青
作者為獨立股評人