萬聖節唔單止大人可以扮鬼扮馬，小朋友亦對呢個「西方鬼節」越來越鍾意，而傳統上小嘩鬼會敲門問人攞糖食，有得食、有得玩。估唔到，紅魔鬼嘅拿尼都識呢招，仲要係熱刺嘅靴里奴高美斯將大波板糖送到入口，想唔食都幾難！
呢塊大波板糖之唔係日前熱刺作客曼聯囉，大家睇電視都見到靴里奴高美斯點樣臨完場前5分鐘將個波送畀拿尼射入網，雖則話拿尼進攻時被踢跌後，的確有出手整停個波，但靴里奴高美斯冇理由覺得對方犯規，就判斷一定係罰球，而將個波放落草地，咁樣就俾拿尼射入咗呢個「世紀入球」，而熱刺想喺比賽後段全力追平都冇機會。
以為罰球放波落地
其實，有經驗嘅球員都應該知道，球證吹咗雞先至係最終判決，既然呢場比賽嘅球證卡頓保完全冇吹過雞示意拿尼手球，即係話仲係生波，咁靴里奴高美斯自己放低個波俾人射入咗，真係冇得好怨，我求大俠絕對贊同卡頓保今次判決。而前國際裁判伍健，都話球證卡頓保冇犯錯。
雙方領隊賽後當然各持己見，講明明年1月唔會再買人嘅費Sir就話，拿尼肯定冇錯，因為佢入波前已見球證示意繼續比賽，仲話靴里奴高美斯係一位有經驗嘅門將，今次的確老貓燒鬚。哈利列納就堅持拿尼入波前已手球犯規，旁證一定見到，所以應該要判熱刺得到罰球。
其實，今季較早前新特蘭對利物浦亦曾經發生過罰球引起嘅爭議入波，當時新特蘭後半場獲得罰球，點知後衞米高端納將個波輕輕力踩後想畀守門員開，球證就判罰球已開，結果被機靈嘅費蘭度托利斯搶走，再交畀古積特射入空門，呢個「世紀入球」亦成為一時佳話。
對熱刺嚟講，輸畀曼聯已成定局，最慘嘅係傷咗今季一直有好表現嘅雲達華治，呢位荷蘭國腳肯定缺陣周中嘅歐聯分組賽迎國米之戰。