旺角行人專用區噚日中午突然發出一聲巨響，約30名市民突然倒卧街頭，全身着上生化保護裝束嘅工作人員仲用粉筆圈低佢哋瞓低嘅位置。
各位唔使驚，呢單並唔係乜嘢突發性意外，只係環保組織綠色和平發起嘅萬聖節送核電街頭劇，幾十人「突然死亡」10分鐘，提醒公眾，政府一旦增加核電輸港至50%，核電廠意外隨時可以造成巨大災難。
環境局未交代核電廠選址
環境局擴大核電輸港嘅公眾諮詢期剩番大約一個月，但係就一直未交代核電廠選址，同埋一旦發生核洩漏對香港可能造成嘅威脅。綠色和平講得啱，乜嘢數據同參考資料都冇，點可能憑局長邱騰華一句說話，就相信核電係安全呢？