【本報訊】警察定期有各項射擊搏擊比賽互相切磋，警犬同樣有技能比賽鬧一番。代表長沙灣警署出戰的瑪蓮萊犬Major工作戰績彪炳，曾為護主惡鬥唐狗，20個月來協助破案超過60宗，迅速動作與威猛氣勢讓牠昨日贏得警犬技能比賽攻擊比賽冠軍。效力港島衝鋒隊的Gabby與領犬員曾昭康合作無間，一聲令下，轉身、坐下、跳圈通通做妥，奪得服從比賽冠軍及全場總冠軍殊榮。
Major個子偏小，但攻擊力不容小覷。領犬員盧繼忠表示，去年6月多得Major相救才能倖免於難，「當時同Major一齊喺通州街公園巡邏，見到個道友啪針，我哋一齊上前同佢糾纏，佢養嘅唐狗突然撲過嚟咬我，Major見到即刻放開口同隻唐狗對峙。」
尋回愛犬 開心過中六合彩
Gabby拍檔曾sir表示，訓練最重要軟硬兼施，「你要佢做啲佢未必想做嘅動作，或要叫停佢，一定要畀誘因，例如佢跳完要畀波波佢玩。」
參加服從比賽的還有年初「離家出走」十日，於長沙灣警署狗房失蹤的警犬安琪（Antje）。領犬員阮宗輝表示，安琪歸隊後不見異樣，估計當日出走與懷孕有關，「可能係想搵個好地方（產子），搵番佢，我真係開心過中六合彩！之後佢生咗7女1仔，幾個月後佢離開狗房再服役嗰陣，喺仔女住間房門口唔願走。」
香港警犬隊與香港愛護動物協會昨日合辦「警犬技能比賽2010」，首以慈善性質開放予市民觀賞，12萬元收益悉數撥捐愛護動物協會。