前星期某日晚上，行經灣仔通利琴行，見到門口大排長龍，覺得奇怪，夜間點解有咁多人入去買樂器，後來先知道，人群係要買參觀世博「清明上河圖」嘅門票。如李怡所云，世博清明上河圖並非原創藝術，只係將原作做電腦加工，話係優秀電子產品就OK，與藝術拉不上關係，不過既然來港展覽，引起興趣都唔出奇嘅。
記得原裝「清明上河圖」曾在香港藝術館展出，左丁山去睇過，當時係有好多觀眾，但遠遠不及今次咁轟動，幾十萬張門票，一掃而空。靚女Y嘅媽咪第一次撲票落空，聽到加推十六萬八千張門票，急忙晨早就去九龍城嘅香港兆基創意書院買飛，九點半去到，已經要排隊尾，其後越嚟越多人，媽咪Y想話唔同人地逼，但又心有不甘，幾大排落去，排隊之時，有人派表格，要佢地填寫買幾多張，在甚麼時間環節，以便賣飛可以快一啲，媽咪Y填寫好之後，忽然見到六至七個年老阿婆行入嚟要排隊，眾人不忍老婆婆在後面企，禮讓佢地行先，點知一個鐘頭之後，眾婆婆買到飛嘞，隨即將啲門票交晒俾一個中年女人，另外有中年男人向買咗票嘅人士收飛，男人跟住大聲兜售：「三百蚊一張，唔駛排隊。」眾人為之嘩然，哦，原來有一班人與阿婆係馬前卒，排隊為黃牛黨買票嘅，成本係十元一張，以三百元放售，毛利好高啫！
媽咪Y見狀，當堂氣頂，堅持排隊，唔買黃牛票，卒之排到下午一點半，排咗四個鐘頭，用八十元買咗八張，如果計埋時間成本，門票算係好貴，黃牛黨之存在，就係倚靠比較低廉嘅時間機會成本（阿婆大概冇時間機會成本可言，況且佢地更以年老博同情，可以排在前面）嚟賺錢，對好多在職人士而言，時間機會成本極高，如果真係好想睇世博版清明上河圖，唯有死死氣買黃牛票。但黃牛利用阿婆博同情，俾人見過一次之後，就再冇人肯禮讓，結果真正為子女買票而排隊嘅阿婆，企到腳軟，此乃黑狗得食，白狗當災嘅現狀。世博版清明上河圖來港展出，其實要多謝馬會斥資一千萬元義助特區政府，政府辦大型展覽，說點解一千萬元都攞唔出，要打馬會心口？以前搞火箭展覽係咁，今次又係，政府視馬會為鍾無艷乎？