一直被視為官場廢話王、人肉錄音機嘅林D9，噚日出席公民黨湯大狀喺城大搞嘅政改論壇。呢個名為「普選，談到何時？」嘅論壇舉行期間，一眾嘉賓發言時，現場一切正常，點知一到林D9上台，話要回應其他講者幾句，同解答呢個論壇嘅主題時，就即刻出事。
一講嘢「普選」就冧
唔知係咪林D9知道大家已經聽厭咗人肉錄音機嘅錄音講話，所以噚日上到台，就扮晒搞搞新意思咁，話要就論壇個題目畀個「比較準確」嘅答案大家，答案就係2018年，原因係2020年就有普選，而政改喺兩年之前就要完成《基本法》修訂，所以一定係2018年咁話，跟住就話好尊重白鴿黨主席何俊仁等人，由80年代開始爭取民主。一眾在場嘅民主派講者，即時O晒嘴，皆因2018呢個數字聽落好新，但其實又係「阿媽係女人」嘅講法。
可能個天都對林D9呢番廢話睇唔過眼，當佢呢番「2018年」論一出，現場即時出現異象，貼喺牆上嘅「普選，談到何時？」橫額，突然由左上角開始甩落嚟，「普選」兩個字唔見咗。坐正喺「普選」之下嘅中文大學政治與行政學系副教授學者馬嶽，目擊「普選」慘被人肉錄音機音波功遮蓋後，即場忍唔住向林D9大嗌：「你一講嘢，普選就冧啦！」引來唔少歡呼聲。難得林D9先天面部肉地特厚，死撐話：「唔係喎，個問號仲喺度，我哋然可以討論。」馬嶽即時抵死反駁：「問題就係個問號永遠都喺度！」
社民連大鬧謝志峰
幾個工作人員此時一面笑一面衝上台，用膠紙將甩落嚟嘅一角貼返上去，令「普選」得以重見天日。身為主人家嘅湯大狀，睇到呢幕亦忍唔住向林D9「致謝」：「多謝林局長咁震撼嘅發言。」
林D9噚日馬不停蹄，朝早接受電台訪問，但就冇出席《城市論壇》，由副局黃靜文做代表。社民連任亮憲大鬧主持謝志峰點解唔搵社民連同公民黨做嘉賓？謝志峰大嘆已經專登叫工作人員買凳加位，嘉賓由4個變6個，有左有右又有窮黨同富貴黨，盡量平衡。
mailto:[email protected]
