【海口直擊】
海南島舉行的「觀瀾湖世界職業明星邀請賽」昨日完結，結果明星隊由曾志偉與鞏怡萍一組捧盃，擊敗曉格蘭特及嘉芙蓮薛達鍾絲等荷李活巨星，更獲得10萬美元（約78萬港元）的獎金，志偉會將他所分得的5萬美元（約39萬）全數捐助Unicef作慈善用途。
英國男星曉格蘭特（HughGrant）、嘉芙蓮薛達鍾絲（CatherineZeta-Jones）、郭富城、曾志偉、任達華及多名中外著名高球手，上星期齊集海南島出席「觀瀾湖世界職業明星邀請賽」，昨日是賽程最後一天，最後由曾志偉以一分之差險勝孫楠，成為明星賽冠軍，擊敗曉格蘭特、嘉芙蓮薛達鍾絲等20位明星，非常威水，落敗的曉格蘭特並未有出席頒獎禮，不過嘉芙蓮就畀面出席。
曉格蘭特拒同性
志偉於頒獎禮後接受訪問時說：「真係好開心，攞到獎金同獎盃，好有意義，除咗金像獎個獎盃之外呢個獎盃都會放喺屋企留念，我打咗17年波，為咗今次比賽再學波，其實我家拍緊《我愛香港》，都係向劇組請假，我同孫楠約好邊個贏都會捐獎金出嚟。」
問志偉獲獎後會否希望成為職業球手？志偉說：「點打都去唔到職業水平。」在球場上可有問候嘉芙蓮丈夫米高德格拉斯（MichaelDouglas）患癌的事？志偉說：「今次係開心事，唔問呢啲，況且又唔係深入嘅朋友。」志偉還爆球場見到曉格蘭特很少跟同性說話，他說：「曉格蘭特唔同男人講嘢，不過同任達華好好傾，可能佢哋有共同嗜好。」
喜見球星古烈治
球星古烈治也有參加今次比賽，志偉說：「我20年前喺意大利見到佢，當時問佢攞簽名佢唔肯，不過今次好開心，可以同佢搭埋同一班飛機。」此外，郭富城昨日有幸獲TigerWood的前教練HankHaney教授球技，教練盛讚城城是他教過五萬多名學生中最有天份的學生之一。城城說：「喺綠茵場上打波，煩惱都拋諸腦後，我都係打過兩、三次，都冇時間學。」
採訪、攝影：曾小嘉