為慶祝成立25周年嘅草蜢，前晚終於完成一連8場嘅紅館演唱會，袁詠儀、伍詠薇、劉美君、梁家輝、蒙嘉慧、周汶錡、許愿同乖女等都有捧場。近年經常同蔡一傑傳出斷背情嘅張耀揚都唔避忌出現，仲不知睇得幾開心。
古仔臨尾走音
既然係最後一場，草蜢三子當然有咁放玩到咁放，當晚嘅嘉賓就係同佢哋好似大纜都扯唔埋嘅古天樂。當日話過唔會唱live嘅古仔可以話畀足面，現場唱出一曲張國榮嘅《想你》。好耐冇公開唱歌嘅古仔唔知係咪秘密練兵，馮仁昭見佢有啲緊張，但有板有眼相當唔錯，仲好有感情，但臨尾香最後都走音，不過依然贏得掌聲。
傑仔同蔡一智為咗報答古仔，各自同古仔嘴對嘴錫一啖，令全場譁然，古仔錫完傑仔仲講笑話：「死喇，你未結婚㖭。」原來古仔未入行時曾經喺製作公司做過，當年佢有份搞草蜢廣州演唱會，蘇志威就喺99年同古仔拍《刑事偵緝檔案》，最後草蜢同古仔合唱《原諒我是我》。當晚草蜢安哥兩次，尾聲時三子指向天話：「每次演唱會我哋都會送畀一個人，多謝阿梅（梅艷芳）。」三子唱完仲忍唔住喊住擁抱。慶功時草蜢話今次只有90分，佢哋話：「50周年先至滿分，我哋會照唱照跳。」