陳七　文彼得　三角突圍

球星賣球技，還賣Fantasy。HKRugby球員裸身促銷月曆，連兩位南華驕子陳肇麒（陳七）及文彼得都代言內褲做現袋人，激凸的Jockey廣告貼滿港鐵站。球員要晉身星級做萬人迷，任腳法如何強勁扭波如何耍家，始終敵不過一個Sex字吸引，例子一二碧咸C朗有辦你睇。

記者：吳允冲
攝影：林栢鈞、陳陶鈞
Wardrobe：GigaSports、Marathon

香港終於有球星

公關表示在本地物色內褲代言人甚艱難，名單上本來只有一個不肯穿三角褲見人的羅仲謙，等如無人可揀。今次棄明星取球星，請到陳七和文彼得大方一脫，都要多得碧咸等人做了個成功例子。貴為足球先生，陳七除了球技精湛，又具備六嚿腹肌和高大身形之外，還有萬人迷必備的條件——緋聞。先前他與李綺雯的複雜關係令他登上C1成名，不過相對碧咸厚過電話簿的桃色X檔案，身為二女爭男事件中的主角的他，緋聞只屬小白兔級。文彼得簽過英皇做偶像，堪稱球場上最靚仔的球員。今次二人成為JockeySportMicrofiberActive代言人，引起網上激烈討論，廣告商亦極度滿意，有望成為香港足球界的Icon。球壇上歷代Icon，陳七話最崇拜碧咸：「佢瘋魔萬千少女，真係幾有型。」拍此廣告難道亦是為了吸引女Fans？他尷尬回應：「盡力而為！」

■外向的文彼得揀內褲以鮮色為主。

■你的焦點停在Peter六嚿腹肌定係陳七的極緊三角褲上？

低調陳七愛平腳

提起拍攝時的過程，二人靦覥狂笑。歌手開演唱會要閉關操練肌肉，但文彼得話平日運動量大，胸肌腹肌隨時Ready，拍攝前只是稍加操練。廣告中以三角褲和平腳Boxer見人，其實平日最愛邊一款呢？陳七：「我會揀平腳，着慣咗，加上Jockey的內褲彈性好，亦都好透氣，做運動好適合。」文彼得：「我都揀平腳但長身的，因為運動員經常落地鏟波，要對大髀內側保護多啲，但平時出街都鍾意三角形。」他更表示選色以鮮色為主，最愛螢光綠，陳七自言係低調派一味愛黑，但二人異口同聲表示有一種顏色不能接受，就係粉紅色！