由葉劉淑儀創立嘅匯賢智庫，一直以港島為根據地。但06年成立至今陸續有唔少高學歷年輕人加入，如果單靠港島區，有志從政者未必有咁多選區落腳，所以匯賢智庫決定衝出港島區，今個月16號會喺將軍澳開設港島區以外首個政策研究中心。
將軍澳係新發展嘅中產選區，唔少政黨都虎視眈眈，匯賢智庫今次殺入將軍澳，預料會引起一番龍爭虎鬥。
八方聽聞匯賢智庫一旦派員喺呢區參選，都會係由年輕人擔大旗。但猛虎不及地頭蟲，葉太非常識做，中心開幕之日請嚟西貢區議會主席吳仕福，以及坑口同西貢鄉事委員會兩位主席做主禮嘉賓，希望啲大佬射住。