港股上禮拜五下試23000關，恒指反覆企於23000上面收市，雖然下跌114點，但日線圖現錘頭形態，成交大增，呢兩日上試10日線嘅機會好大。
講番成交，上日現貨成交高達1359億，主要拜新上市嘅友邦（1299）所賜，1隻股就493億，超過總成交三分之一，咪話唔勁，不過就算扣除友邦嘅成交，大市交投都唔算細。投資者觀望花旗QE2嘅細節，港股暫時會個別發展，內銀股繼續撐大市，汽車股同友邦會繼續受追捧。
友邦C輪26300：友邦上日報收23.05元，較招股價升17.1%。散戶急急套利，基金就密密收貨，尾市掃貨更加唔手軟，睇嚟短線好快會見25元，估計去到27元先至會有較大阻力，可以諗吓隻C輪26300。
隻輪上日報收34.5仙，2011年5月6日到期，行使價21元，溢價6.1%，引伸波幅35.4%，槓桿率6.7倍（有效4.6倍），正股升上27元，26300睇65.7仙，升幅9成，正股跌穿21.80元嘅話，就沽咗隻輪。
俊樺