大家樂剋扣員工飯鐘錢犯眾憎，網上改圖組即時做嘢，將佢改名做「太刻薄」。不過太刻薄並冇吸取教訓，前日派出行政事務助理總監溫明出嚟死撐，兼狂篤同業背脊，以為咁樣可以甩身。記者會上溫明牙尖嘴利，原來佢另一個身份，係一位詩人，曾經同王偉明、胡燕青等合編過《詩網絡》。
曾寫詩哀嘆修路工
據講呢位下海詩人，佢係美國加州國立大學人力資源碩士，出版過《送女帖》同《青山粉絲廠》等詩集。佢老哥喺文壇仲有個外號叫「黑教徒」、「古秋城」，最諷刺係佢創作過有關修路工嘅詩句：「算算你的命/值日薪多少」。詩人廖偉棠噚日喺facebook上講述呢位同行嘅身世，廖偉棠話新聞報道形容溫明喺記者會上一時苦笑一時皺眉，「盡顯詩人風範」。有網民就話唔知呢個係黑色幽默，定係白色悲劇？
無獨有偶，溫明嘅文壇戰友胡燕青早幾日寫咗篇文狂插太刻薄，佢話老百姓千算萬算，都算唔出資本家「一丈魔高」。「大家樂有法律顧問，即使犯眾憎也不會犯法。不過，不犯法不等於公義，不犯法不等於善良」。唔知溫明又會唔會寫番首詩去表述心迹呢？