不經不覺，鄧萃雯已跟黎耀祥兩度合作，下一部劇，雯女希望能轉換對手。雯女說：「係o架！我真係咁嘅人，觀眾都會悶啦，都要畀啲新嘢佢哋。我幾想同黃子華合作，幾想拍喜劇。我覺得大家都係一個幾有character（性格）嘅人，撞埋會幾得意。我從來未試過同子華合作過。其實我都可以做啲賤賤格格嘅人。」
主動爭取工作
原來，雯女曾主動跟子華提出合作，是一個相當主動的人。雯女說：「係o架，我自細已經係一個咁樣嘅人，以前做《寰宇風情》，去亞馬遜森林，我直情走上公司寫字樓，寫自己個名喺佢哋塊黑板度報名，我覺得冇乜嘢唔好，有好多嘢係要表達要爭取，你唔出聲嘅話，人哋以為你覺得辛苦唔想做。自從嗰次我表達完之後，李瑜叔（資訊文教科前高層）有乜嘢辛苦難啃嘅都第一個問我去唔去。」
如此主動，難道不擔心令人誤會為喜歡爭？雯女說：「問心無愧咪得囉！我邊有爭啫，都冇人報名，我自己報名啫，如果本身搵咗人嘅，我自己攝埋去就話爭啫。呢個係排隊，我好守規矩o架，我冇請食飯送禮，佢有權話唔用我，我只想畀佢知道我好渴望做，因為好多人以為花旦冇期又怕辛苦。就算嗰陣時添哥（李添勝）都係我主動同佢講，叫佢退休之前拍吓我啦，如果唔係，我真係覺得好遺憾。我只不過係一個咁簡單嘅諗法啫。」
雯女續說：「添哥一直唔用我，一定有原因，不過我冇問，佢亦冇同我講，可能一個人對另一個人會有啲誤解，你表白咗人哋咪知囉！」
「我牙齒當金使」
添哥找雯女開拍續劇，還未知演甚麼角色，雯女已一口答應。雯女說：「我牙齒當金使，有啲報道好離譜，話我臨開工要加人工，我係啱啱相反，我好有義氣o架，我哋呢啲做事嘅人講咗就係，TVB根本唔容許你咁做，佢哋冇咗邊個都得，啲人話我吊高嚟賣，呢個直情係違反合約原則！」