BMWM3CoupeGTSEdition　M3碳纖雙辣

歐洲車越來越多選擇，就算係身價過百萬的跑車，車款都可以睇到你眼花，可以喺一眾跑車中脫穎而出，有多少本領之餘，仲要有新鮮感。好似寶馬高性能版M3Coupe咁，改款無耐，又推出碳纖味甚濃的M3CoupeGTS版，即時將辣味升呢，要招搖定要低調，任君選擇。

記者：趙慧敏
攝影：楊錦文
Model：Ericko@Zmodel

碳為觀止

如果跑車都要講性格，新款的M3Coupe絕對是內斂型，雖然以高性能為賣點，不過相比起其真正實力，外形算得上斯文低調，佢真正有幾跑得，單睇外形，你真係估佢唔到，不過高調的跑車總有其捧場客，所以最近推出的碳纖版M3CoupeGTS，絕對能迎合這班招搖一族。雖然動力性能與M3Coupe相若，但外形卻增加大量搶盡視線的碳纖配件，與基本版的碳纖車頂襯到絕，首先在車頭兩側，就配置了碳纖擾流器，水滴形的側鏡，亦換上碳纖物料，不過講到搶眼程度，車尾反而是焦點，今次車廠在車尾設置一幅碳纖鴨尾翼，令整體風格更加一致之餘，行車當然更定更快。

加料　怠速熄車

既然貫徹黑碳主題，四個轆又點會無佢份。今次合金輪圈由原裝的銀色換上19吋黑色輪圈，跑起嚟當然型過人，至於性能上，M3CoupeGTS更增加Start/Stop怠速熄車功能，燈位前停車，引擎即時關掉，再踩番油門，又可以自動啟動引擎，減少廢氣之餘，都慳番唔少油，最緊要係起步速度極快，絕唔會因為熄車影響加速表現。為作跑車車主，對內櫳當然有番咁上下要求，否則幾跑得都無用。中控台用上大量黑灰格仔紋皮料配飾，加埋張桶形真波電動座椅，令全車高貴之餘亦跑味滿瀉。性能方面，M系一向係寶馬引以為傲之作，配備4公升V8引擎，輸出去到420匹，400Nm峯值扭力喺3,900轉已經釋出，加埋個MDCT七速雙離合器波箱，用埋加減波功能，轉波反應極為敏銳，當然作為寶馬家族身價過百萬的跑車，質素點會無保證。