在虛擬的戲劇世界裏，鄧萃雯幸運地遇上一個比一個更完美的男人，繼《巾幗梟雄》的柴九後，《義海豪情》中的劉醒是一個更體貼、女人夢寐以求的好男人。不過，雯女坦言對手越完美，便越難令她找到真對象。雯女說：「寫到祥仔一個角色咁正，其實係推我去到一個死位，我好容易希望自己現實生活中都會有，變咗越嚟越難遇到。」
撰文：戴彩煥
繼《巾幗梟雄》後，鄧萃雯在《巾幗梟雄之義海豪情》中遇上一個比柴九更完美的男人劉醒。
猶記得雯女曾表示，生命中若能遇上柴九這樣的男人便此生無憾，那麼，在雯女心目中，劉醒跟柴九比較，又最愛是誰？
雯女笑說：「兩個都一樣正！劉醒係女人夢寐以求嘅男人，佢有老婆嘅時候好愛錫老婆，男人之中係冇得頂。柴九對四奶奶嚟講只係一個靈魂伴侶，唔代表你可以同佢一齊生活，唔代表你好愛慕佢，佢哋之間係冇一個談情關係。但劉醒可能會好啲，今次劉醒同九姑娘係寫多咗好多感情落去，係一個愛情關係。」
教堂過夜愛到入心
是否因為上次四奶奶與柴九未能徹底去愛，所以今次加重二人感情戲份？雯女說：「聽華標（編審張華標）講係，因為觀眾要求、渴求，上次柴九要死，好似拆散咗佢咁。」雖然雯女今次跟祥仔做情侶，卻是有愛冇性，就連咀嘴鏡頭也沒有？雯女說：「係o架，我哋一齊喺教堂過夜，但乜嘢事都冇發生。教堂係我哋見面傾偈嘅地方，我趕佢走，佢仍然唔放棄，仍然默默支持我，我覺得呢種親密感更加強，呢種愛比起錫、比起上床差太遠，嗰啲做完之後有幾入心啫？但家呢種係經歷好多嘢都唔放棄，再加上嗰個時候嘅我又唔靚、又唔好環境、又乞人憎、又危險，佢都唔肯走要同我一齊，仍然陪我，拖住我隻手。」
今次九姑娘與劉醒在戰後失散多年後重逢，雯女認為是最完美結局：「有啲人覺得唔錫唔上床邊度算係情侶，但我又唔係咁睇。」
見盡完人難覓真愛
可渴望生命中能遇上劉醒這樣一個完美男人？雯女笑說：「華標寫到祥仔一個角色咁正，其實係推我去到一個死位，因為每一個劇都經歷咁高質素、一個咁為你嘅男人。你唔使講，大家已經明白對方，當你做緊大事嘅時候，佢又唔會煩你，柴九好多時會帶好多麻煩畀你，但劉醒係知道你幾時需要佢，幾時要彈開，佢只係喺適當時候攝出嚟。嘩！呢啲男人去邊度搵呀？佢仲要做你背後嘅男人喎！我本身已經要求高，家成日喺戲劇裏面見到啲咁完美嘅男人，呢啲咁好嘅男人喺虛擬世界度有，好容易希望自己現實生活中都會有，變咗越嚟越難遇到。」
學做王妃等60歲嫁
雯女渴望被愛、渴望遇到一個像劉醒般知情識趣的完美男人，但卻從不心急。雯女說：「可能自己未學識去愛，要預備一個王子降臨，我都要時間學識去做一個王妃o架！所以我從來都唔心急，我好正面，充滿希望，好似阿姐（汪明荃）咁，成60歲先至結婚，我覺得好正！我係一個幾怕悶嘅人，我好想結婚之後大家都好掛住大家、好sweet、間唔中會浪漫吓，唔想耐咗之後會悶。如果我有80歲命，60歲至結婚，咁咪可以冧住咁去死囉！有好多老夫老妻覺得老伴好煩好黐身，我唔想變成咁。」
場地：Misto
服裝：CalvinKlein
化妝：OMIXB
髮型：KelvinKooofhair