力寶（226）無論相對系內或亞洲區磚頭股嘅折讓，吸引到不得了，力寶超抵買。力寶最新每股NAV10.73元，現價（2.96元）折讓72.4%，系內香港華人（655）NAV折讓63%、力寶華潤（156）得38%。力寶份屬旗艦，全程受惠呢兩家企業嘅資產增值，但折讓仲咁大，講唔通。就算喺力寶重點發展嘅星洲，當地重磅磚頭股好似嘉德置地及城市發展，折讓已經收窄到唔夠50%。力寶仲有呢個折讓水位，又係離晒譜。
喺低息兼量化寬鬆時代，資產價格繼續吹大，係咁意計數，以力寶6月底投資物業加聯營公司賬面值87.4億銀，重估多20%，已經可以額外增值17.5億銀，超過集團現市值14.8億銀。力寶重秤後每股NAV14.23元，折讓近80%，就算翻一番到5.90元，折讓仲高達58%。
和記行PE低前景佳
汽車或關連股份變火箭，板塊尋寶，要買和記行（720）。和記行冇產銷汽車，但喺中港代理分銷法拉利及瑪莎拉蒂名車業務。祖國湧現唔少超級富豪，加埋股樓暢旺，和記行肥仔水。單係最新半年度，集團已經虧轉盈2960萬銀（去年同期蝕5940萬銀），全年度純利起個孖到5920萬銀，PE得7倍幾單位數。和記行現價翻一番到0.37元，PE都係得14倍。
錢雋