香港人大概都發過六合彩夢！每次走入投注站買金多寶（獎金無3,000萬係吸引唔到我嘅）時心中就在盤算，「若果中獎，我會點用呢？」明顯地，唔中獎繼續買都有20年，一切安排早已深思熟慮，只有一點可以肯定，就係死口唔話畀任何人知；因為20年前可以改變我生命的3,000萬，今日只能買一個合心意的公寓而已，興致當然不再勃勃。
打開《蘋果》，見到富商兩個女友合資認購友邦保險最大額定單（俗稱頂頭槌飛），一天內賺了1.8億，咁啱，體育版報道上季由英超降落英冠的樸茨茅夫，由於班主財困未能償還向香港富商錢禮（BalramChainrai、持英國護照有尼泊爾血統）借貸的1,700萬鎊（約2.1億港元），惟有將球會拱手相讓，錢禮成為樸茅新主席。
原來2億可染指英超（若樸茅升班），我即時心雄，角色代入，既然大家都鍾意「頂頭槌」，難道繼續買那些無止境出新款的名牌手袋？現在連挽鱷魚皮都會跟人同款撞色，我的虛榮是，鱷魚皮手袋你挽過，但英超球會你又玩過未？
鹹魚先無夢發
嘩！真係越諗越high，當我係英超球會主席，不要說英國，肯定世界各地球迷都會認識我的名字；再者，電視轉播總有一、兩個鏡頭對住個主席，起碼我睇英超轉播都見過英超歷史上首個華人班主，伯明翰主席楊家誠幾次，我成為歷史上首個華人女性班主，以採訪角度，只會更加受傳媒好奇和歡迎！
再進一步，接觸到那些大名鼎鼎的領隊以及萬人迷球星，哈哈哈！買得球會除了有錢，恐怕都真係鍾意睇波，既然係咁，用球會主席的名義應該買咩飛都冇難度，你知喇，招呼親朋戚友坐私人飛機去睇波有時在所難免?嘛！最驚一個唔該，球會經營有道，賺大錢，到時就真係唔知點算好咯……
我知你想講：「盧覓雪，你憑咩發夢呀？買六合彩中3,000萬嘅入場費就話5蚊啫，但認購友邦保險一日賺1.8億，入場費要15.3億！你有冇富商男友吖！」唓！夢都唔畀發？咁同一條鹹魚冇分別？！
文：盧覓雪