"「亨利」出現高追阿奴"
阿仙奴連續兩仗炒對手兼零失球，上次講過莊家上周其實睇好阿仙奴作客曼城，開波前跟風客唔少；周中佢哋喺盃仔對紐記，半力都俾大家煲爆嗰1.8倍客W跌至1.62倍，莊家恨之入骨？今次兵工廠對包尾嘅韋斯咸，如現今牛市一樣，稍為回吐一千幾百點唔少人即如驚弓鳥放走優質股，日日買日日走，又唔係炒鬼，損耗戰力實無謂。我信隊波人腳漸齊正上飛快軌道，何況韋咸太沉，行軍速率不及主隊；好嘞，開到[-2]，但見到件14號波衫今季頻頻入波，禾確特有亨利當年喺阿仙奴開始勇熟嘅影子，進攻又多瓣咯！懶理現今分組賽多強弱懸殊形成漸弱嘅歐聯效應，阿仙奴應該唔會收主力應付下周中作嘅既薩克達，[-2]，波友有無畏高症？
"冬令也好令自己克制"
冬令到來，大部份波都押後一粒鐘開波，我唔怕凍，但要我頂到凌晨四、五點睇場西甲，難度都幾高，除非皇馬對巴塞嘞！
波開遲啲未必係壞事，注碼有限，段段賭有個油井都乾啦；周中，搞到成三點九開嘅歐聯同聯賽快車，唔係場場都值得通頂睇，瞓醒覺收到錢有時都會好愉快。
"捧靴高斯W睇分頭"
強如皇馬都冇可能場場贏，不過好多人會長追呢類超級大名牌。
但捧冇名氣嘅升班馬，就一定先重賠率，貼到黑池贏利記開12倍W前，呢個欄都幾灰，但回報唔係睇一日，無論受到幾多批評冷言冷語，最重要持之以恒行啱路，人家對你嘅睇法自會改觀。
靴高斯嘅神奇大家都有睇過，今次迎戰皇馬，雙箭希度華迪同查斯古特出得，單W7.6倍，小弟推介唔會手軟，要穩，博入球「大」啦。
"莊家玩嘢不左右貼熱刺"
曼聯今屆老實講，絕大部份嘅波打唔出8成以上水準，無論上周作客贏史篤城同剛戰周中險勝狼隊，都有啲好彩，班波究意係沉緊定好似以往性能未上力，要睇多陣先知；今次迎戰往績食硬嘅熱刺，小弟一向唔太重往績，熱刺兼顧歐聯似乎越嚟越有辦法，現時排名超出我預期，賠率太懸殊，馬會又玩嘢，開出讓球盤曼聯讓一球，似想氹擁躉落叠，博上盤起碼有走盤；但從觀戰看，呢場波冇朗尼嘅曼聯讓唔起一球，博大霧5.5倍客W，實際啲博[+1]。
10場推介賭到周一深夜
上周末打風唔成，賭波由鯨魚2:1波膽中到正，去到叫大家周日尾場博阿仙奴冷W，真係炮炮響；氣勢回升，其實球季開了近3個月，周末重點阿積士、阿仙奴、黑池同鯨魚輪流作重心都算有交代。不過其他波我都有好興趣十元八塊搵吓感覺，今次我推介大家其他聯賽嘅心水供大家參考；心跳W、曼城W、錫周三下盤、荷華高斯「大」、櫪木SCW、維拉W同黑池平手，加埋前述3場重心，共10場賭到禮拜一深夜，睇吓中到幾多場！
蘋果波神
語錄：見到大場面唔駛感到兵慌馬亂，因為你嘅中長線心水球隊，唔會因場數多少而改變，一出場，配合適當嘅策略大細注，爭取合理回報。