做官應該一言九鼎，官話唔係廢話，可惜大部份官員都係講廢話高手，一直被視為官場廢話王、人肉錄音機嘅林D9，堪稱廢噏第一名嘴，不過遇到教育局局長孫公，恐怕林公公都要甘拜下風！
政府寧願花幾百億元興建高鐵、申辦亞運，都唔捨得搞小班教學，孫公早前爆料，指小班教學開支高達400億元，隨時係無底深潭，計唔掂條數，貿然推行可能埋唔到單。
公民黨余大狀對呢個數字充滿疑問，一個月前去信教育局要求解釋數字究竟點樣計出嚟，不過一直冇回音，三催四請，孫公先後派出副局陳維安同政助楊哲安應酬吓議員，但一直未能交代400億條數。
余若薇追問條數點計
余若薇話幾年前已追問小班教學開支，當時官員羅范椒芬都有講過，印象中講一次少一次，因此對於孫公報數400億元充滿疑問，懷疑係發水報大數，因此追問到底，點知提問一個月都冇回覆，佢話官員如此不負責任，好離譜。
孫公噚日終於有個說法，話將余若薇封信放錯咗文件櫃，所以睇唔到，先至遲遲未回覆，家陣搵番封信出嚟，會盡快覆信。唔講由是可，一講把幾火，有冇搞錯呀，公函竟然隨處放，係孫公懶理議員提問，抑或對小班教學訴求採取鴕鳥政策，有意無意掃入地毯底當睇唔到呢？
下月7日教協大遊行
實情係點，八方唔會揣測，不過記者噚日問孫公400億數字點樣計出嚟時，孫公個答案，竟令人好訝異──佢話當時議員問佢推行小班教學開支金額，係假設性問題，所以佢回應一個假設性答案。唔回答假設性問題係高官口頭禪，孫公唔交行貨，作出「假設性答案」，真係一個爆炸性創意嘅講法。孫公咁講，即係承認當日提出400億元呢數字係隨口噏啫，問責官員言論咁兒戲，市民日後仲點信你？
教協11月7日發起爭小班、反殺校大請願，孫公忽然話400億數字係「假設性答案」，唔知會激起多少師生家長參加請願？
mailto:[email protected]