如果王家衛的《花樣年華》及《2046》是將劉以鬯的作品《酒徒》及《對倒》幻化成電影語言的華麗堆砌，開宗明義改編成同名電影的《酒徒》，則是竭盡全力保留原著的神髓。
《酒徒》男主角潦倒，電影拍攝團隊的資源也相當拮据，此片沒有梁朝偉和張曼玉坐鎮，換上的是台灣資深演員、型男張震父親張國柱及新人蔣祖曼。導演兼監製的黃國兆形容相對王家衛的海派作風，其作品是窮人劇作。事實是電影歷盡滄桑始能開拍，最終黃國兆還得加按自住房屋來為電影埋尾。擺明是「儍瓜」的導演，找來一班更儍的中學同學仔出錢出力支持，圓夢之餘，還想證明文藝電影未死。
撰文：何永寧
電影開拍緣起身兼導演、監製及編劇三職的黃國兆，他於09年獲法國政府頒發法國藝術及文學騎士勳章，表揚他推動香港及法國兩地文化交流的貢獻。同是新法書院出身的一班中學同學仔得悉後非常雀躍，相約慶祝直接促成《酒徒》的誕生。
同學夾錢圓電影夢
黃國兆說：「班同學仔覺得班裏面有個同學攞呢個獎與有榮焉，一般騎士勳章都會頒畀一班導演或者藝術家，好似王家衛、樂團指揮葉詠詩、台灣嘅侯孝賢同蔡明亮，我未拍過片都攞到算係難得。可能同我經常推薦拉攏香港電影去康城、南特影展有關。成班同學都好興奮，席間有幾個有經濟能力嘅同學仔知我有個劇本好想拍，二話不說就籌咗差不多200萬畀我開戲。」
投資者當中，包括九鐵前高層黎文熹，加上藝術發展基金的少許資助，以及火鳥電影會的老友瞓身支持，黃國兆這個魂牽夢縈十多年的夢，終能落實。拍電影永遠不夠錢用，特別是要拍懷舊片，他說：「戲裏面好多好似啲文學書、擺設都要搵私伙慳得就慳，就算張國柱用嗰支墨水筆，都係我父親嘅遺物，成套戲都只有19組，好多工作人員同演員都係拍膊頭幫手。但有啲好似戲服咁冇得慳，最後錢用晒電影都未埋到尾。」
為埋尾按寓所套現
只差一步便到終點，黃國兆一咬牙將北角自住的物業拿去銀行加按，結果套現的60萬也轉瞬花光，尚幸電影終於完成，他笑說：「都洗濕個頭，唔再放錢落去就變咗血本無歸，亦唔好意思叫班同學再出錢，佢哋已經好幫手，好在太太同囝囝都好支持。」自言是儍瓜一名，難得有一班人陪他儍，最壞打算是電影連一毫子也不能回籠，屆時便大屋搬細屋。
沉迷其實全因一個夢，黃國兆10多歲時便看過《酒徒》原著，當時印象只是矇矇矓矓，直至在法國修讀完電影回港，隨着經歷增加再細看小說情節，一時驚為天人，決意將之改編成電影。他10年前已跟當時仍是《香港文學》月刊社長兼總編輯的劉以鬯見面買下版權，踏出開拍《酒徒》的漫長路。
香港年輕一輩對劉以鬯的認識，或許來自王家衛執導電影《花樣年華》和《2046》，以為戲中身光頸靚的梁朝偉，正是小說《酒徒》中潦倒主人翁劉先生的化身。扮演小說家和編輯的偉仔，周旋於一襲又一襲美艷旗袍之間，美人鞏俐、章子怡和張曼玉俱伴在他身畔。
讚張國柱氣質出色
因《酒徒》小說背景與作者劉以鬯的相似，因此不少人誤以為《花》片中不羈的偉仔，正是作者劉以鬯年輕時的寫照，黃國兆說：「劉老師同太太結咗婚成50年，劉太同我講佢先生係一個好有紀律嘅人，每日一早起身寫稿，到中午食完飯會出去行一陣再寫，往往寫作到深夜，日日如是。一個人一日要寫13篇連載小說，單係整理故事連貫性都已經好花心思，仲邊有多餘精力去做其他嘢？其實好多小說作者都鍾意投射自己入個主角加埋幻想，好似徐訏嗰本《風蕭蕭》都係咁，又係講一個作者戰時喺上海生活，所有女人見到都會愛上佢，啲女人仲係不同國籍嘅間諜。」
劉以鬯的《酒徒》，被譽為中國意識流小說先驅，電影對此也有保留，但點到即止，黃國兆說：「戲裏面嘅意識流會用旁白同閃憶鏡頭表達，始終電影如果太流於意識觀眾要好花心思去睇明。選角方面我覺得好滿意，張震爸爸張國柱好有文人氣質，可以演到戲中劉先生不甘於寫一啲低俗故事，賣文為生而借酒澆愁嘅滄桑，我哋喺《花城》合作過，女主角蔣祖曼有indie（獨立電影）皇后之稱，佢一人分演男、女兩個不同角色恰到好處。」
嘲王家衛侵犯版權
黃國兆指《酒徒》演員質素，絕不遜於梁朝偉和張曼玉的組合，只是輸在知名度而已。不過有王家衛兩齣作品在前，《酒徒》被拿來比較肯定難免，對此黃國兆帶點自嘲地說：「佢拍嘅係豪華版，我部頂多係窮人版，不過美效同服飾唔會輸蝕，美指黃仁逵喺有限資源下有咁嘅表現，我真係好感激佢，佢都係花城幫，做到美而廉。」同一條古老大街，同一個時空，卻拍出不一樣的寫實味，對於王家衛，黃國兆說：「其實佢拍《2046》時有搵過我想買《酒徒》嘅版權，我話賣就唔賣嘞，不如合作，最後佢冇理自己走去拍咗，嚴格嚟講佢都算係侵權，亦因為咁原本我只想監製同編劇，最後要自己做埋導演。」