施政報告致謝動議辯論三日後，噚晚終於表決，一如所料被否決收場，由於幾成慣例，冇乜好講，反而投票時出現蝦碌場面，民協馮檢基老貓燒鬚，㩒錯掣支持施政報告，好彩佢即時發覺，否則又被質疑係泛民無間道。
要求再投票全場爆笑
由於泛民提出六個修訂動議，連同原動議，議會共要㩒七次掣投票，頭六個要跟泛民大隊，阿基都係投支持票，到第七次㩒掣，佢竟然臨尾香，應該投反對票，卻跟住隔籬位李國麟㩒支持個掣，張國柱見到，問阿基做乜忽然倒戈，阿基先發現出事。
投錯票可大可小，阿基即時同主席曾鈺成講自己㩒錯掣，要求重新投票，全場爆笑，曾鈺成話未宣佈結果，提醒所有㩒錯掣議員有第二次機會，阿基即時更正。會後阿基解釋因為連日開會，精神不足所以一時錯手，又話其實唔使同主席講，只要㩒番投反對票個掣就可以，搞到出洋相，真係瘀爆。阿基話自己做議員咁多年，今次係第一次投錯票，真係老貓燒鬚。