華人置業集團主席劉鑾雄（大劉）旗下的TheOne商場，昨晚舉行開幕派對，大劉親自率女友甘比和兒子劉鳴煒主禮，城中官紳商賈富二代如何超瓊、何猷龍夫婦、李民斌、李民橋、林孝賢及潮媽徐濠縈等均畀面撐場，原定出席的李兆基兒子李家誠和媳婦徐子淇，則疑因避談李家傑的代母產子及追仔話題而臨時甩底。
恭喜李家傑添丁
TheOne總投資達25億，問劉鳴煒會否帶小朋友遊商場時，他竟倒米說：「太逼人，好似唔適合小朋友，我又唔係成日shopping，嚟呢度都係為工作。」提到李家傑買卵借肚誕三胞胎成為城中熱話，劉鳴煒謂閱報得知，他說：「做爹哋當然恭喜，但代母呢啲唔識答。」
同場的阿徐育有一女康堤，但之前她曾謂想追多個，昨晚她說：「我陀康堤時好舒服，但事隔六年老咗，怕再生辛苦，我唔介意搵代母。我都知中國人比較保守，我個人就冇問題，BB健康就得，都係自己嘅卵子同埋先生嘅嘢結合，只係陀BB嗰個唔係你啫。」
採訪：李珮洳 攝影：黃文成