憑《義海豪情》排骨仔角色而人氣大升嘅敖嘉年，大前晚同《花花世界花家姐》演員唱K時，涉嫌被同劇嘅冼灝英襲擊受傷，搞到眉骨爆裂要縫針同報警求助。據講敖嘉年早年曾跟冼灝英學大聖劈掛，但最後嘉年拜陳觀泰為師，令到冼灝英好不滿。
「家不停咁眨眼」
嘉年前日凌晨報警之前，曾接受商台錄音訪問，有關訪問噚日播出，當中嘉年講番事情始末，佢話：「當晚有人用酒杯掟落我度，掟中左眼。我暈一暈，跟住見佢一拳打埋嚟我度，我用手一擋，好明顯見到係冼灝英嚟。」至於對方點解出手，嘉年就話唔多清楚。
嘉年噚日返無綫交代，佢話冇嬲冼灝英：「就算嗰晚我都冇嬲，只係好愕然。」講到傷勢，佢話：「家不停咁眨眼同大細超，面部肌肉有啲麻痹，使唔使磨皮要視乎11月頭拆線後嘅情況。」
與冼灝英寃家路窄
之後嘉年揸車返北角寓所，喺佢停紅綠燈嗰陣，冼灝英竟然咁啱得咁蹺喺嘉年部車後面行過，都算寃家路窄。不過，佢哋雙方都冇發現大家。原來冼灝英住喺嘉年隔籬大廈，佢一見記者即刻左閃右避話：「唔好影啦！」跟住衝落港鐵站鬆人。之後冼灝英返去北角寓所又撞見記者，然係乜都唔肯回應。