中大新聞與傳播學院噚日舉行45周年晚宴，請前一哥李明逵做演講嘉賓，題目係「如何提升公營機構的傳訊策略」。李一哥話請佢嚟講呢個話題真係多謝晒，皆因佢在位時同傳媒關係一般，搵佢講傳訊策略，簡直錯配。
李一哥講笑啫，97年回歸夜佢出動貝多芬對抗示威聲浪，此一絕招前無古人，後無來者，八方都想跟你學嘢呀。言歸正傳，李一哥講到近日傳媒投訴警方拖延發放突發事件消息，質疑警方箝制新聞自由；李一哥反駁投訴荒天下之大謬，指科技進步，警隊通訊器材幾年前開始革新，傳媒追唔上與人無尤。
佢有個譬喻，話有家人本來住一樓，無遮無掩任人偷窺，現時搬上二樓，外人無法偷看，瞥伯反而投訴嗰家人，「邊有國家開放警方頻道俾人偷聽o架」。李一哥都幾誇張喎，記者唔係瞥伯，只係伸張公眾知情權，極權國家先至黑箱作業，香港警隊冇理由倒退，李一哥你話係唔係？重提貝多芬事件，有人問佢係咪任內最大危機，佢話徐步高案先係，笑問：「貝多芬係邊個？好似同我一樣，退咗休咯喎。」