當身邊各方友好如臨大敵，紛紛將投資組合嚟個清貨大行動，賺蝕都好先卸一卸貨，另一位小朋友就索性將手上白銀清倉，唔同人竟然不約而同行動，有人會話老散計數，即係個市仲未見頂，但上述行為令人記起汶川地震前，也曾出現過蟾蜍大遷徙嘅徵兆。兩幫人都話既然睇唔通後市，索性避一避風頭，小股民無謂牽涉入大戶廝殺嘅刀光劍影，都係揸住現金舒服啲喎！
下個星期擔定凳仔睇大龍鳳，起碼過咗11月2、3兩日，到時係龍係蛇睇定啲等4號再出擊。因美元反彈觸發近期累積升幅甚大嘅港股、商品同外幣，短期掉頭向下機會依然較大，事關市場自8月底開始炒作嘅次輪量化寬鬆（QE2），根本唔係出自聯儲局主席伯南克之口，只係市場對伯老說話嘅放大解讀，佢由頭到尾冇講過會再印銀紙，咁又何來量寬呢？
睇定啲再出擊
8月底佢只係話美國經濟復蘇力度較預期弱，冇明示就被解讀為佢係暗示再推量寬！唔印銀紙越踩越深本來係好事，起碼唔使擔心點樣為更大規模救市撥亂反正玩退市，但過去兩個月因為呢個預期，導致美元冧檔下升埋升埋嘅股滙商品，又應該點收科？
禮拜頭美國財政部拍賣嘅100億美元通脹掛鈎債券（TIPS），竟然出現前所未有嘅負孳息率，債主貼錢畀美國政府買保障，反映市場真係對通脹上升有強烈嘅預期。債王格羅斯在其網站撰文勁鬧QE2買資產，形同龐氏騙局，勢將令30年債券牛市壽終正寢，透過刺激通脹嚟救市只會觸發反效果，但冇耐佢接受CNBC訪問，就改口話自己支持QE2，今日的我打倒昨日的我，為的只是收視率。
末日博士麥嘉華月中喺投資報告「Gloom,BoomorDoom」，預言未來3個月要買入股票，同時拋棄手上現金及債券，因為美元及利率會上升。股神畢菲特早前亦叫大家放棄債券買股票，好多人因為咁，就支持咗佢隻比亞迪（1211）。眾說紛紜，信邊個好？
胡孟青
獨立股評人