香港高官唔係面目模糊，就係樣貌可憎，因此多數唔係幾受市民歡迎，近日終於打破宿命，運輸及房屋局局長鄭汝樺Eva近日人氣猛漲，成為宅界10月之星，事關佢當頭棒喝唔係買樓先有幸福，結婚唔一定要買樓兩句金句良言，幾成男生應付女朋友嘅標準答案，局長嘅說話，連未來外母都唔敢亂咁反駁，Eva又點能夠唔成為宅界偶像呢？
話對賣樓奸商不手軟
噚日Eva再發威，喺立法會上表明唔怕任何來自地產商或超能量力場，對賣樓奸商絕不手軟咁話。話說噚日立法會第二日辯論施政報告內容，由於李氏力場令颱風鮎魚路徑轉移之說甚囂塵上，好多網民寧可信其有，懷疑幾時掛風球有考慮商人因素，議員為民請命，發言時都有提及呢個官商勾結嘅疑點。
會計界陳茂波就以社會學解釋，民間對於所謂李氏力場嘅超自然力量理論，好充份咁反映出社會上部份市民對相關地產商嘅不滿同怨氣，天文台可以漠視李氏力場呢種非一般現象，懶理市民質疑，不過政府卻不能不嚴加正視，否則後果可大可小。
動漫《新世紀福音戰士》入面個AT力場，要靠EVA中和，言之鑿鑿嘅李氏力場，就要搵呢個Eva對付，事關議員最關心李氏力場有冇影響香港房土地政策，Eva身為運輸及房屋局局長壓力好大，佢噚日就向議員公開表明，有信心抵抗防禦任何力場，強調「睇唔到有乜嘢力場阻住我嘅工作」！
方剛將鮎魚讀成鯉魚
Eva此話一出，據講唔少議員都話要買定花生，有人更私下同八方講，一於睇吓局長如何大發雌威應付李氏力場，需知道李氏力場威力無遠弗屆，影響範圍據說遠至中南海，特區官員頂得住商界力場，擋得住阿爺出手咩？
議員一連三日辯論施政報告，相信致謝動議今日被否決機會極大，今年辯論笑料多，好多議員將鮎魚讀成「占」魚，方剛最離譜，讀成「鯉」魚，火藥味則減少，因為毓民入院做眼部手術，噚日開刀，手術成功。
mailto:[email protected]