「和仔」李健和日前喺坪洲街坊代表選舉贏咗，認真叻仔，不過另一個「禾仔」禾確特仲叻，喺周三英聯盃16強入兩球幫阿仙奴大炒紐卡素4:0，而且場場入波以6球成為兵工廠嘅首席神槍手，佢個英超正選位應該坐定粒六。至於「賓仔」賓特拿嘅入球率都好高，但睇怕就冇「禾仔」咁好命水，要同查馬克爭英超正選位囉。
李健和：佢穩定性不足
喺周三作客對紐卡素場英聯盃16強比賽，阿仙奴領隊雲格排出個陣都幾強，啱啱傷癒復出嘅禾確特同賓特拿就正選，法比加斯則喺後備席。原來場波唔算一面倒，點知紐記龍門告魯爾喺完半場前「屙蛋」兼波撞頭擺烏龍，搞到喜鵲洩咗道氣；結果阿仙奴下半場由禾確特梅開二度，加上賓特拿亦入1球大勝4:0完場。唔講唔知，之前因傷唞咗近個半月嘅禾確特，原來係兵工廠嘅神槍手，仲勁過隊長法比加斯同埋今季弗到漏嘅拿斯尼。連埋周三嗰兩個入球，禾確特呢隻英格蘭快翼今季幫兵工廠上陣6場入6球，每場平均入1球，真係犀利。
雲格話：「禾確特好弗。一開季佢就狀態好好，但好衰唔衰喺代表英格蘭對瑞士時受傷。你會見到佢門前嘅把握力改善咗，另外喺處理一腳波方面亦有明顯進步。佢只有21歲，好多球員喺呢個年紀先開始比賽；而佢既年輕又聰明，所以我認為佢仲有好大嘅發展空間。」雲格大讚禾確特，咁「和仔」又點睇呢個「禾仔」呢？「和仔」話：「禾確特好後生好有潛質，可以為阿仙奴前線提供多一個選擇，但穩定性略嫌不足，有時影響咗臨場發揮。我認為佢有條件可以踢得更好，不過需要比賽狀態去維持表現。」
賓特拿查馬克爭踢中鋒
禾確特弗成咁，加上連雲格亦公開讚佢，只要唔傷，睇嚟應該係兵工廠喺英超嘅精銳一員。除咗禾確特之外，丹麥中鋒賓特拿亦好弗，喺本月中傷癒復出後3場入2球，但弊在同佢踢同一個位置嘅查馬克都好勇，上陣13場入6球，所以肯定要爭餐死。另外，華美倫同哥斯尼原來係兵工廠後防中路正選，點知受傷而畀佐羅同埋史基拿斯上位成功，家陣哥斯尼已傷癒復出，華美倫亦好快出番嚟，到時4個外援球員爭兩個中堅，睇吓最後邊兩個先至係贏家。
兵工廠今屆神槍手
球員：禾確特
上陣場數/入球：6場6球 每場平均入球：1球
球員：拿斯尼
上陣場數/入球：10場7球 每場平均入球：0.7球
球員：賓特拿
上陣場數/入球：3場2球 每場平均入球：0.67球
球員：法比加斯
上陣場數/入球：8場4球 每場平均入球：0.5球
球員：查馬克
上陣場數/入球：13場6球 每場平均入球：0.46球
球員：艾沙維
上陣場數/入球：13場5球 每場平均入球：0.38球
註：上陣場數包括英超、歐聯及英聯盃
只列部份