港股昨日止跌回升，恒指收23210，升46點，成交760億元。前日大跌後，昨日感覺唔到有大拋售壓力，估計大市在23000點水平略作整固後會出現反彈，但由於大市已轉勢，趁反彈減磅，才是上策。
今個升浪，恒指由8月31日低位20372起計，到10月14日高位23866，足足升咗個半月，共上升3494點，升幅17.1%，出現一次中期性調整，合情合理，以調整前升幅的0.382計，恒指可見22531點，調整0.5計，可見22120點。
大市調整浪已開始，調整幅度越深，日後上升的力度越大，估計跌市會維持一個至個半月時間，年底前，大市可再開展新升浪，估計12月上半月會係趁低收集的大好機會，下一個升浪，今次未郁過嘅股仔，會輪到。
時富投資（臨時編號2940）昨日1拆10，最高0.58元，收0.56元，升2.1仙。一個禮拜前（10月21日）推介，當時股價4.45元（拆細後為0.445元），上升目標指向0.55元，現已達標，由於技術表現仍然強勁，可繼續持有，或沽一半，留一半。
時富股價越升越有，主要係受網遊業務發展的刺激，旗下主理網遊的摩力集團，短期內就會推出兩個網遊巨著，帶動公司盈利急升。
上月底推介嘅天津發展（882），當時股價5.98元，一個月都冇大變動，在6元水平上落，昨日最高6.06元，收6.02元，升8仙，走勢復再轉強，升浪隨時出現。
注資時機快成熟
津發為天津市窗口公司，現時正醞釀重大的資產重組，時機一成熟，就會進行注資同併購，目標是國有資產，盈利能力一定要強。
睇周線圖，今年初開始，津發走勢形成一個圓底，底部在4元，現時造緊「右柄」，收集完成再起步，照度上去，目標係8元。
再睇遠點，由08年初開始，津發走勢成個大圓底，底部在2元，右柄整固亦超過1年，隨時會爆升，量度上升目標係10元，在現水平入市，值博率甚高。
郭兆誠