噚日先講完曼城嘅阿根廷前鋒泰維斯掛住屋企掛到思鄉病發，原來佢已經靜雞雞飛咗返老家會妻兒，不過今次泰維斯係得到領隊文仙尼批准嘅。話說泰仔喺對阿仙奴一役整傷咗大腿，要唞兩個禮拜，即係嚟緊幾場聯賽同歐霸分組賽都唔使預佢，加上巴洛迪利已傷癒，艾迪巴約又狀態唔錯，曼城都唔等人用，於是文仙尼就做番次好人，放泰維斯返阿根廷養傷兼見吓屋企人，希望佢可以有最佳嘅心理同生理狀態，趕及踢11月10日對曼聯嘅打吡戰。文帥咁做的確通情達理，既可以改善吓自己同泰仔嘅關係，又可以喺其他球員心目中建立正面形象。