陳淑莊Tanya同男朋友八年感情告終，好多佢身邊人聽到消息都嚇一跳，公民黨黨魁余若薇噚日話，9月初南區補選時，仲見到英雄哥探班，估唔到兩人會分開。黨友因為公職犧牲感情生活，余若薇話從政嘅人真係冇乜私人時間，好彩佢有個超級好老公，事關唔係咁多男人忍受到老婆成日唔黐家。
已開始適應
另一位議員林健鋒噚日都有慰問Tanya，佢話Tanya心情冇乜異樣，仲同佢講笑，話最衰平日少做facial，言下之意，可能係話如果多啲時間扮靚，就唔怕冇人追啦。林健鋒話，聽聞唔少人請纓幫Tanya做紅娘，話唔定好快就有新戀情。
Tanya個facebook噚日溫情滿瀉，好多人留言慰問佢，Tanya話本來唔想將私事公告天下，但由於佢拍拖早已公開，分手遲早會有人提起，所以先簡單交代，令大家為佢擔心覺得唔好意思，佢話已開始適應變化，會從容面對。